Galledeaddjimeriid bealis bivnnuhamos álbmotmeahcit ledje jagis 2023 Lappis dego ovdditge jagiin. Maŋimuš viđa jagi áigge Lappi álbmotmeahcit leat šaddan bivnnuhabbon jagis nubbái: galledeamit ledje mannan jagi 13 proseantta eanet go 2019. Viđa jagi áigge galledeaddjit leat gávdnan maiddái Lappi geasi.
– Lea buorre ášši, ahte galledeaddjimearri Lappis ii leat lassánan nu olu dál koronajagiid maŋŋá. Mii leat bargan dál olu álbmotmehciin, vai suodjaluvvon luondu gierddašii lassáneaddji galledeaddjimeriid, dadjá joavkovástideaddji Inari Ylläsjärvi Meahciráđđehusa Luonddubálvalusain.
Ovdamearkka dihtii galledeaddjiloguid bealis bivnnuhamos álbmotmeahcis, Bállás-Ylläsduoddara álbmotmeahcis, bivnnuhis Varkaankuru johtolat oaččui mannan geasi suvdilut ja govddit oriid. Varkaankuru johtolat lea ráddjehusavádagas, nuba bálgás ii oaččo spiehkkasit. Maiddái Pyhä-Luosto álbmotmeahci johtolagaide leat dahkan seammalágan buorádusaid ovdamearkka dihtii Isokurui.
Urho Kekkonen álbmotmeahcis fas Niilanpää-Rautulampi gaskii lebbejuvvui čievra, vai johtolat livččii dorvvolut vánddardeaddjiid ja meahccesihkkelastiid oktasaš geavahusas, iige boađášii dárbu spiehkkasit bálgás. Suoma ođđasamos álbmotmeahccái Sallai leat dahkan olu ođđa bosihansajiid ja buoridan johtolagaid.
Álbmotmeahcit leat luonddusuodjalanguovllut, maid Meahciráđđehusa Luonddubálvalusat dikšu.
– Midjiide lea dehálaš, ahte galledeaddjit gudnejahttet luonddu ja iežas dorvvolašvuođage dihtii dihtet, gosa leat vuolgimin. Danin mii leat geahččalan maiddái ođđa vugiid rávvet daid geat vulget meahccái. Jagi loahpas gárvánan Urho Kekkonen álbmotmeahci vuolggapoarta lea dás buorre ovdamearka, bálvalanoamasteaddji Pirjo Seurujärvi dadjá.
Suoločielggi vuolggapoartta digišearbma muitala áigeguovdilis dieđu daidda geat vulget Urho Kekkonen álbmotmeahccái.
Statistihkat dan muitalit: Lappi geasi leat dál gávdnan
Maiddái geassemánotbajit leat šaddan bivnnuhabbon álbmotmeahci vánddardeaddjiid gaskkas. Go veardidat jahkái 2019, geassemánu galledeamit Lappi álbmotmehciin leat lassánan badjel 15 proseantta, maiddái suoidne- ja borgemánu galledeamit leat lassánan.
Ovdamearkka dihtii Pyhä-Luosto álbmotmeahcis bođii mannan suoidnemánus galledeaddjiolahus go veardidat ovddit jagiid suoidnemánuide. Galledeamit Pyhä-Luosto álbmotmeahcis ledje suoidnemánus 2023 badjel 34 000.
– Árabut vánddardeaddjit leat varra sáhttán garvit gaskageasi muohkiriid ja earáid geasi divrriid dihtii. Soaitá leat, ahte olbmot leat dál fuomášan, ahte ijahis Lappi geasseidja fiinna luonddus lea vásáhus, man gánneha áinnas vásihit. Sávvamis maiddái báikkálaš fitnodatdoallit fuomášit dan ja dollet bálvalusaid rabas ain eanet geassitge. Álbmotmehciid galledeaddjimeriid mielde potentiála gávdno, joavkoovddasvástideaddji Joel Erkkonen Meahciráđđehusa Luonddubálvalusain muitala.
Lappi álbmotmehciid galledeaddjilogut 2023
- Bállás-Ylläsduoddara álbmotmeahcci, galledeamit 584 000
- Urho Kekkonen álbmotmeahcci, galledeamit 417 600
- Pyhä-Luosto álbmotmeahcci, galledeamit 217 400
- Oulanka álbmotmeahcci (luontoon.fi), galledeamit 175 800
- Salla álbmotmeahcci (luontoon.fi), galledeamit 62 200
- Riisitunturi álbmotmeahcci (luontoon.fi), galledeamit 61 200
- Leammi álbmotmeahcci, galledeamit 23 900
- Mearrabađa álbmotmeahcci (luontoon.fi), galledeamit 6 400
Lassedieđut
- Meahciráđđehusa Luonddubálvalusaid dieđáhus álbmotmehciid galledeaddjimeriin olles riikkas 26.1. “Käyntimäärät: kansallispuistojen suosio retkeilykohteena jatkuu vankkana” (luontoon.fi)
- Galledeaddjimearit (metsa.fi)
- Ávki báikkálašekonomiijai (metsa.fi)