Bákkolaš guliiddikšunmáksu guoská jahkemolsuma maŋŋel buot 18–69-jahkásaš guolásteddjiid. Riikkabeaivvit dohkkehii láhkanuppástusa disdaga juovlamánu 12. beaivve. Ovdal guliiddikšunmáksu lea leamaš bákkolaš 18–64-jahkásaš guolásteddjiide. 

Máksingeatnegasvuohta ii dattetge guoská olbmuid, geat leat háhppehan deavdit 65 jagi 31.12.2023 rádjái, dehege visot jagi 1958 riegádan olbmot leat bestojuvvon guliiddikšunmávssus. Riikkabeaivvit mearridii guolástanlága 79 § nuppástusas jienastusa maŋŋel.   

Guliiddikšunmáksu lea bákkolaš buohkaide 18–69-jahkásaš guolásteddjiide, geat guolástit muđuid go jieŋa nalde oaggumiin, oaggumiin dehe dettolaš sallitsiimmain, mas leat seavttehis roahkanat.  

Nohkavaš jagi guliiddikšunmávssut čoggoje 10 miljovnna euro. Guliiddikšunmávssu sáhttá máksit olles kaleandarjahkái, vahkkui dehe jándorii. Guliiddikšunmávssu čoaggá Meahciráđđehus, mii luobaha olles supmi eanan- ja meahccedoalloministeriijai. Ministeriija bealistis juohká ruhtaváriid guollečáziid ja guolástusa buorrin guolástanlága mielde.