Meahciráđđehusa stobuid vuovdinkanála ođasnuvvá – Várremiid jahkái 2025 beassá dahkat skábmamánu álggus
Várren- ja láigostobuide, maid Meahciráđđehusa Luonddubálvalusat bajásdoallá, sáhttá dahkat várremiid jahkái 2025 spiehkastatlaččat easka skábmamánu 2024 álggus. Boahtte jagi stohpovárremat dahkkojuvvojit ođasnuvvan Eräluvat.fi-bálvalusas. Dás duohko maid várren- ja láigostobuid oahpásnuhttimat gávdnojit seamma báikkis. Stobuid čoavdagat oažžu dás maŋás čoavddaskábiin báikki nalde ja sierra čoavdagiid viežžanbáikkiin luhppojuvvo.
“Jagi 2025 várremat dahkkojuvvojit njuolga ođđa vuovdinvuogádahkii. Áššehasat ožžot dieđu čoavddagássa kodas várrema olis. Reaissuid plánemis gánnáha guorahallat maid eará idjadanvejolašvuođaid, dego dealtáidjadeami, lávuid ja idjadanvejolašvuođaid, maid min idjadanovttasbargofitnodatdoallit fállet,” bálvaluseaiggát Katja Heikkinen Meahciráđđehusas dadjá.
Meahciráđđehusa Luonddubálvalusat bajásdoallá vánddardeddjiid atnui sulaid 150 várren- ja láigostobu álbmotmeahcis, eará luonddusuodjalanguovlluin ja meahcceguovlluin. Stobut leat vuohččan dárkkuhuvvon gaskaboddasaš idjadeapmái reaissu olis.
Stohpogovvádusaide ja reaisočuozáhagaide gánnáha oahpásnuvvat fuolalaččat ovddalgihtii
Lundui.fi-fierbmebálvalusas gávdno dehálaš diehtu reaisočuozáhagas, johtolagaid gáibideaddjivuođas ja vánddardeaddji biergasiin. Oassi Meahciráđđehusa stobuin leat geainnohis mátkkiid duohken eandalit riikkamet davve- ja nuortaosiin.
Várren- ja láigostobuid lassin vánddardeddjiide leat fállun nuvttá beaive- ja ávdinstobut. Ja idjadit sáhttá iežas dealttás dehe eará orrunsajis maid vuoiŋŋastanbáikkiid olis. Beaivestobut leat dárkkuhuvvon vánddardeddjiid beaiveatnui, ja dušše spiehkastatdáhpáhusas dain sáhttá idjadit. Ávdinstobut leat dárkkuhuvvon vácci, čuoigga dehe eará ládje iežas vuimmiiguin priváhtaolbmuid gaskaboddasaš vuoiŋŋastan- ja idjadanatnui.
Láigostobut leat dárkkuhuvvon vuohččan priváhtaolbmuid atnui. Stuora joavkkut galget váldit vuhtii eará vánddardeddjiid. Bálvalanráhkadusaid geavahus fitnodatdoaimmas gáibida álohii ovttasbargosoahpamuša ja geavahanbuhtadusa máksima. Iešoaivves johtti stuora joavkkut ávžžuhuvvojit geavahit idjadeapmái juogo iežaset dealttáid dehe várrenstobuid.