Rávvagat Čárbmoaivvis johtaleapmái
-
Guovllus leat fámus juohkehačča vuoigatvuođat (suomagillii).
-
Stáhtaeatnamiin Davvi-Sámi Meahciráđđehus diktá bidjat dola eatnamii gahččan rissiin ja ovssiin almmá sierra lobi haga.
-
Dolastallan meahccebuollinváruhusa dahje sitnobuollinvára áigge lea gildojuvvon.
-
-
Muitte guođđit almmuhusa alddát, iežat áigetávvalis ja vánddardanjohtolatplánas ustibiiddásat ja lagamus oapmahaččaide dahje Meahciráđđehusa Luondduguovddáš Siidii.
-
Heahtedáhpáhusain galgá vuosttasin geahččalit riŋget nummirii 112! Guovllu gádjunbálvalus lea lága mielde lágiduvvon, ja dasa fidne oktavuođa heahteguovddáža bokte. Muitte almmuhit maiddái, go leat ollen dohko gosa ledjet mannamin, amaset ohcagoahtit du duššiid dihte. Gádjunbálvalus bearrá mávssu dušši ohcamiid dihte.
Ovddalgihtii ráhkkaneapmi
Mátketelefovnnaid gullon
-
Vaikko Suoma mátketelefonfierpmit gokčet viidát riikka, de Čárbmoaivvi guovllus sáhttet leat báikkit, main telefovdna ii gullo. Dárkkis mátketelefonfierpmi govčču iežat telefonoperáhtoris. Dasa lassin leat álo báikkit, main mátketelefovdna ii doaimma dahje doaibmá funet. Dalle sáhttá ábuhit dat, ahte manná birastahtti duovdagis badjelii jalges sadjái ja/dahje váldá telefovnna SIM-goartta eret heahteriŋgema boddii. Gánnáha maiddái váldit vuhtii dan, ahte sierralágan mátketelefovnnaid gaskkas leat gullonearut.
Biergasat
-
Čárbmoaivvi meahcceguovlu heive maiddái dakkár kompássadovdi vánddardeaddjái, guhte ii leat nu hárjánan johtit meahcis, dasgo guovlu lea viehka gárži. Čárbmoaivi leat goittot buiga meahcceguovlu, mii lea davvin ja mas váilot merkejuvvon johtolagat ja fuolahuvvon stobut. Danin vánddardeaddjis galget leat áššáigullevaš biergasat: kárttat, kompássa, tealtá, doarvái biktasat, oađđinseahkka ja doarvái niesti.
-
Čárbmoaivvi meahcceguovllus leat arktalaš dilálašvuođat, man dihte vánddardeaddjis galget leat áibbas iežaslágan biergasat. Geasseguovdilge dilálašvuođat sáhttet molsašuddat boaldi báhkas čoaska muohtaborgii. Dálvit buollašiid áigge sáhttá leat máŋggaid beivviid vuollel 20 gráđa. Jos vánddardeaddji ii leat albmaláhkai ráhkkanan ja sus eai leat albma biergasat, de sáhttá geavvat vaikko man funet.
Dorvvolašvuohta
- Jus dus reaissustat boahtá heahti, ovdamearkan láhppot, lápmašuvat dahje áiccat meahccebuollima, riŋge nummirii 112 ja daga heahtedillialmmuhusa.
- Váldde mielde vuosttašveahkki dárbašiid.
112 Suomi -mobiilaaplikašuvdna
Go heahtetelefovdnii riŋgejuvvo 112 Suomi -aplikašuvnna (112.fi, suomagillii) bokte, de heahteguovddášgohcci oažžu automáhtalaččat dieđu riŋgejeaddji sajádagas.
Lappis leat ollu báikkit gos telefon ii gullo, ja dihto telefonmállet eai doaimma buollašis. Nuba máđidjaplána oktan áigetávvaliin lea buorre almmuhit soapmásii. Gánneha doallat telefovnna liekkasin sihke biepmu ja juhkamuša fárus. Vai mátketelefovnnas ii nogaše rávdnji, váldde mielde ovdamearkan liikerávdnjerusttega, várrebáhttera dahje boares telefovnna, mas lea buorre báhtter.
Vánddardanetikeahtta
1. Gudnejahte luonddu.
2. Vállje merkejuvvon máđijaid.
3. Váldde čielgasa leago gohtten lobálaš du válljen čuozáhagas.
4. Geavat dušše merkejuvvon dolastallansajiid.
5. Ruskkahis vánddardeapmi.