Lappis, Guossámis, Kainuus ja Davvebađaeatnama davveosiin vánddardat boazodoalloguovllus dahjege bohccuid ruovttobálgosiin ja boazodoalliid bargosajis. Boazodoalloguovllu davveoassi lea earenoamáš boazodoalloguovlu, ja Anár, Ohcejohka ja Eanodat ja Soađegili davveoassi maiddái sámiid ruovttuguovlu, gos boazodoalus lea stuorra mearkkašupmi. Kultuvrra ja árbevieruid geahččančiegas boazu lea mihtitmeahttun dehálaš ja buktá maiddái láibbi eatnatlohkosaš bearrašiidda ja bajásdoallá máŋggaid davvi giliid ealaskassan. Boazodoalloguovllus bohccot besset friddja guohtut ja boazodoallit lihkadit boazobargguin mohtorfievrruiguin.
Vánddardeaddji garvá
Divttáthan leat bohccuid ráfis. Boazu lea árgi ja dávjá garvá olbmo. Lahkonan olmmoš buktá bohccuide badjelmearálaš streassa, mii eandalii garra dálvediliin sáhttá leat várálaš. Loahppagiđa guotteha áigge lea eandalii dehálaš garvit bohccuid guhkes mátkki duohken. Báhtareami váibadan guoddi áldu dahjege njiŋŋálasboazu sáhttá reitot álkit.
Čavčča ragatáigi bidjá bohccuid johtui giiváseappot go dábálaččat. Dalle varris bohccot sáhttet navdit du soakŋogilvvohallin, ja dalle lea buoremus bissut guhkkeleappos bohccuin.
Boazodoallit johtet boazobargguin njealje- ja guđajuvllagiiguin ja skohteriiguin ee. čohkkedettiin bohccuid bigálussii. Muhtumin čohkkenbargguin sáhttet ávkkástallat maiddái helikoptera. Jus gárttat fáhkkestaga guovdu ealu, biso báikkistat dassái go eallu lea mannan meattá. Muhtun bálgosiid jođus lean boazobargguid sáhttá gávdnat dieđu čujuhusas www.porotyöt.fi, suomagillii.
Giddethan boazoáiddiid verráhiid
Boazodoalloguovlu lea juhkkojuvvon 54 bálgosii dahjege boazodoalloovttadahkii. Boazoáiddiiguin eastadit bohccuid beassama nuppi bálgosa guvlui. Maiddái bálgosa siste sáhttet leat áiddit guohtonguovlluid gaskkas. Áiddiin lean verráhiid galgá muitit giddet, jus dat ledje juo álggus gitta. Jus bohccot besset nuppi bálgosa beallái, šaddá das bálgosii gollu ja lassebargu. Muhtumin verráhat sáhttet leat maiddái namalassii rahppojuvvon, ovdamearkan guohtunlotnašuvvanáiddiin. Dalle verráhiid galgáge guođđit rabas.
Beatnagat ja bohccot
Beatnagiid veaddimis ásahuvvo meahcástanlágain ja ortnetlágain. Luonddusuodjalanguovlluin, dego álbmotmehciin ja luonddumehciin beana galgá leat álo gitta. Spiehkastahkan lea davvi álbmotmehciin báikkálaš ássiid ávkkástallan ja boazobargguin lean beatnagat.
Bohccuin movttiidan beana sáhttá váibadit ja vearrámus dáhpáhusas goddit eandalii smávva miesi. Beana sáhttá hehttet boazobargguid háddjemiin ealu, dalle boazobargiid bargu manná duššás. Boazu ballá beatnaga ja reagere dasa dego spirii. Ále dalle lahkon bohccuid beatnagiin, ja fuolat, ahte beana ii beasa veaiddalassii.
Boazobarttat
Boazodoallit lihkadit earálágan boazobargguin birra jagi. Máŋggain guovlluin leat boazodoalu doarjjabáikkit, dego boazobarttat, mat sáhttet leat rabas ja vánddardeaddjiid anus. Oassi sáhttet leat lohkkaduvvon. Boazobarttat leat boazodoalliid oamastusas, ja lohkkaduvvon barttaid ja daid šilljobiriid privasitehta galget johttit gudnejahttit.
Almmut boazoisidii jápmán bohccos
Jus áiccat jápmán dahje lápmašuvvan bohcco, almmut das boazoisidii. Maiddái heahteguovddážii sáhttá dahkat almmuhusa, jus dus eai leat bálgosa oktavuođadieđut. Váldde bajás gávdnanbáikki nu dárkilit go vejolaš, ja sáhtát maiddái merket báikki muhtun vugiin. Ále váldde bohccos maidige mielde, ovdamearkan beljiin lean piltamearkkaid dahje čeabetbáttiid, muhto jus das leat juoga identifisereme álkidahttán mearkkat, váldde daid dieđuid muitui. Govva rohpas álkidahttá ee. jápminsiva čielggadeamis.
Máŋggat bálgosat mákset jápmán dahje lápmašuvvan bohcco almmuheamis smávva buhtadusa váivvi ovddas. Bálgosiid ovttastusa siidduin lea doaibmaráva jápmán bohcco gávdnamis www.paliskunnat.fi/py/kuollut-poro, suomagillii.
