Bargga ná!
-
Ane málesteamis milloseappot meahccevuoššanasa go sajusdola.
-
Jos cahkkehat sajusdola, ane merkejuvvon ja fuolahuvvon dolacahkkehanbáikkiid álohii, go dat lea vejolaš.
-
Ane dolastallamii várrejuvvon muoraid seastevaččat.
-
Muitte, ahte meahccebuollinváruhusa áigge sajusdola cahkkeheapmi lea gildojuvvon eará sajes go biippuin rustejuvvon vuoššangoavddis.
-
Ale lokko beassi dehe doaje márfesákkiid ealli muorain.
-
Jos cahkkehat dola eará sadjái go dasa čujuhuvvon báikái, de dárbbahat álohii eananeaiggáda lobi.
-
Ale cahkket dola rabas báktegierragii - báhkas cuvke geađgegierraga.
-
Ane boares dollasaji.
-
Jos dakkár ii gávdno, de luvve eatnamis olggumuš, muoldoeanangearddi ovdamearkkadihte rássegoaivvuin ja giesa dan ravddabeallái.
-
Čoakke boaldenmuorran ovssiid, mat leat eatnamis, ja vejolaš čuollanbázahusaid.
-
Časkat dola fuolalaččat dolastallama maŋŋel čáziin ja jorggo luvvejuvvon eanangearddi ruovttoluotta sadjásis.
-
Manne?
Dolastallanbáikki boaldenmuorat leat stáhta eatnamiid vánddardančuozáhagain dábálaččat fievrriduvvon dohko guorbmebiillain ja mohtorgielkkáin. Ná eananvuođđu gollá ja muoraid geaseheapmi dagaha bázahusaid ja šláma.
Šattolašvuohta ja eananvuođđu gollaba eandalit dalle, jos cahkkehat dola eará sadjái go merkejuvvon dolacahkkehanbáikái. Boares dollasajiin vuohttá dávjá luottaid das, ahte dollasaji birrasis leat váldojuvvon muorat ja oavssit dehe juobe loktejuvvon bihkásguottut. Dollasaji eananvuođđu lea buollán ja dollasajes gávdnojit dušše muhtin muddui buollán foliobáhkat ja eará ruskkat. Buolli muoras luovvanit mirkkolaš suovvagássat. Dat leat čitnadáza, PAH-ovttastusat, heahki ja hávkaga oksidat. Loga lasi dola cahkkeheamis (suomagillii).