Johtolatčilgehusat

Johtolatčilgehus Gilonanoaivi – Suomunruoktu – Tuiskukuru – Luirojávri – Lankojávri – Gilonanoaivi

• Gilonanoaivi–Suomunruoktu (14 km)

  Vánddardanmáđidja álgá duottarguovddáš Gilonanoaivvi šilljus. Jođe vuos merkejuvvon Rávdoláddo (Rautulampi) máđidja mielde Niilaoaivvi (Niilanpää) boazoáiddi lusa ja mohkkas doppe merkekeahtes bálgái Suomunruovttu ávdin- ja várrenstobu guvlui. Govda bálggis čuovvu Suomujoga. Suomujoga lea álki rasttildit bartta buohta.

• Suomunruoktu - Tuiskukuru (13 km)

  Suomunruovttu barttas bálggis joatkašuvvá Suomujoga guora miehterávdnjái. Áideádjaga lahka lea šaldi, man maŋŋá johtit Vintiläduoddara guvlui. Harrihaara gierragiin dollet Tuiskukurui. Nubbi molssaeaktu lea vánddardit Suomujoga luobbaliid bokte. Goarkŋo luobbaliid maŋŋá Vintiläádjaga guora Pikkuduoddariid máttabeale marastagaidda ja njieja doppe Tuiskukurui. Tuiskukurus lea ávdin- ja várrenstohpu.

• Tuiskukuru –Luirojávri (8 km)

  Tuiskukuru barttas mátki joatkašuvvá Ampuoivviid máttabealde Luirojávrái fiinna beahcevuovddis ja marastagain. Rasttil Luiro guoikkaoaivvis, gos geassečázi áigge čáhci lea vuollel čippiid. Luirojávrris lea Luirojávrri ávdin- ja várrenstohpu, Kuusela láigostohpu, Rájá bartta ávdinstohpu sihke museostohpu Raappana gámme.

• Luirojávri - Lankojávri (19 km)

Bálggis čuovvu Luirojávrri oarjegátti Lankojávrái. Joatkke Vasanlyömäpää ja Joukhaisoaivvi gaskka Suomujoga guvlui. Palovankkajoga rastá manná lahka Suomujoga šaldi, man bokte jotkojuvvo joga guora miehterávdnjái Lankojávrri guvlui. Suoločielgi–Gilonanoaivi- kártii leat merkejuvvon Lankojávrri máttabeale gállinsajit. Dulvin joga ávžžuhit rasttildit Goahtegeavgŋá šalddi bokte. Luirojávri – Lankojávri -bálgá guoras leat sihke guolbanat ja fiinna duottarduovdagat. Lankojávrris lea ávdin- ja várrenstohpu.

• Lankojávri - Gilonanoaivi (19 km)

  Lankojávrris johtá čielga bálggis Rávdoádjaga guora oarjjás Rávdoláddo beaivestohpui. Bálgá guoras návddašat vuovdeduovdagiin. Rávdoláddos jođát rabas duottarguovlluin ruossagalbbain merkejuvvon máđija mielde Niilaoaivvi bokte Gilonanoaivái. Máđidja lea geađgái ja govdat.